Ngayogyakarta, www.jogjatv.tv - Samangke kathah masyarakat ingkang remen dhateng ulam pasren, inggih wiwit saking lare-lare ngantos tiyang diwasa. Tumrap pandhemen ulam pasren, ngingah ulam pasren boten namung setunggal jinis kemawon, ananging racakipun ngingah sawetawis jinis ulam pasren. Kangge pados ulam pasren, tetela gampil. Salah satunggalipun saged dipun panggihaken ing wewengkon Balirejo, Timoho, Ngayogyakarta. Puluhan jinis ulam pasren kadosta koi, komet, arwana lan lohan, cumawis ing papan punika. Para bakul ndhatengaken ulam pasren kasebat saking Tulung Agung, Jawa Timur.
Kejawi nyawisaken ulam pasren, papan punika ugi nyawisaken aquarium jangkep rerengganipun. Regining aquarium wiwit saking Rp. 15.000,- ngantos yutan rupiyah, gumantung saking gatranipun.
Ngupakawis ulam pasren, mboten namung minangka karemenan kemawon. Ananging kangge pangupakawising ulam lan akuarium, ugi kedah dipun wigatosaken. Akuarium kedah resik, toyanipun kedah asal saking sumur, sarta kadar oksigenipun kedah cekap. Menawi srana punika dipun cekapi, pramila ulam pasren saged gesang kanthi ngrembaka.
Gama-Lala-Afin
