Klaten, www.jogjatv.tv - Paguyuban Kawula Keraton Surakarta utawi Pakasa, malem Selasa kala wingi(4/4), ngadani Upacara Tolak Balak Ladhu Redi Merapi, mapan ing Pendhapi Taji Prambanan. Ancasing upacara kasebat kangge nyuwun dhateng Gusti Ingkang Maha Kawasa, supados musibah alam ladhu Redi Merapi, lan maneka pacoban sanesipun sageda tumuli lerem.
Warga ing wewengkon Prambanan lan sakiwa tengenipun rumaos prihatos, awit ladhu Merapi tetela langkung mutowatosi tinimbang saderengipun, ingkang samangke sampun dumugi wewengkon Prambanan, Kemalang lan Manisrenggo. Awit saking punika, Paguyuban Kawula Keraton Surakarta utawi Pakasa ngadani Upacara Tolak Balak Merapi. Upacara dipun wiwiti kanthi kirab tumpeng. Pralambang budaya ingkang dipun kirab antawisipun, tumpeng suci ingkang ngemu teges sucining nala, nyuwun dhateng Gusti Ingkang Hakarya Jagat lan tumpeng golong, supados sedaya saged nyawiji. Wonten ugi tumpeng giling, utawi tumpeng sewu, ingkang tegesipun bilih kridha punika mujudaken krenteging warga, mboten namung pepinginanipun satunggaling tiyang kemawon.
Kirab tumpeng kasebat, dipun tampi dening GKR Koes Moertiyah, minangka Pangageng Keraton Surakarta Hadiningrat, salajengipun dipun dongani lan dipun rahapi sesarengan. Lumantar Upacara Tolak Balak punika, dipun ajab musibah ladhu Merapi, tumuli lerem lan warga saged gesang kanthi ayem, tentrem, aman, tata raharja.
Haryadi
