Sleman, www.jogjatv.tv - Genjer ingkang padatanipun gesang ing rawa-rawa, kajawi gagangipun saged kangge damel barang kerajinan, pranyata ronipun ugi saged dipun ocal dados masakan ingkang miraos. Yayah ingkang gadhah wande dhaharan monosuko ing Dhusun Prenggan, Desa Sidokarto, Kecamatan Godean, Sleman, ngocal genjer dados masakan balado sambel genjer.
Miturut Yayah, genjer saged dipun ocal dados masakan balado ingkang raosipun eca, manis lan pedhes. Kejawi miraos kangge lawuh dhahar, genjer pranyata ugi nggadhahi daya kangge ngusadani sesakit asam urat. Wondene caranipun masak, genjer dipun kumbah ngantos resik, lajeng dipun kum toya benter ngantos alum. Sasampunipun punika lajeng dipun masak mawi racikan bumbu trasi, tomat, sarem, brambang, bawang, lombok abrit lan gendhis Jawi. Wondene anggenipun masak namung watawis 3 menit. Kangge damel masakan balado genjer, ing saben dintenipun Yayah nelasaken genjer 10 unting. Yayah nyade balado genjer kanthi regi Rp. 5.000,- saben setunggal porsinipun. Menu punika sampun jangkep kaliyan sekul lan lawuhipun. Kejawi nyawisaken menu balado sambel genjer, wande ingkang madeg wiwit taun 2003 punika, ugi nyawisaken wader goreng, urang goreng, ayam goreng, lele goreng lan sawernaning sayur. Wande ingkang pelangganipun para bakul peken punika, bikak wiwit jam 09.00 WIB ngantos jam 18.00 WIB.
Heru, warganing Koramil Godean, Sleman mujudaken pelanggan wande monosuko. Miturut Heru, masakan balado genjer trep kangge dhahar siyang. Kejawi raosipun eca, genjer pranyata nggadhahi daya kangge ngusadani sesakit asam urat.
Nadi Mulyadi
