Sleman, www.jogjatv.tv - Pedhotipun Kreteg Pabelan ing Kabupaten Magelang, Jawa Tengah, pranyata mangaribawani dhateng regining sayuran ing sawetawis peken tradisional ing Sleman. Bab punika awit sayuran ingkang dipun sade dening para bakul ing Sleman, racakipun dipun dhatengaken saking Magelang, Jawa Tengah. Satemah pedhotipun Kreteg Pabelan mangaribawani dhateng mindhakipun wragad transportasi. Tundhanipun regi sayuran lajeng mindhak.
Sanak kadang bakul sayuran ing Peken Tempel, Sleman mratelakaken, maneka jinis sayuran ingkang dipun sade racakipun dipun dhatengaken saking wewengkon Jawa Tengah. Awit saking punika, pedhotipun Kreteg Pabelan ing Magelang, sawetawis wekdal kapengker tetela nganggu lampahing transportasi angkutan barang ingkang tumuju dhateng wewengkon sanjawining Magelang. Tundahanipun pangintuning maneka barang, kalebet sayuran, saking Magelang tumuju Sleman, mbetahaken wekdal sakelangkung dangu. Kanthi makaten, regining maneka jinis sayuran mindhak langkung awis.
Sinaosa regining sayuran mindhak, ananging regi panyadening lombok samangke mandhap. Kadosta, lombok kriting abrit ingkang sakawit reginipun Rp. 25.000,- saben kilo, samangke mandhap dados Rp. 15.000,- saben kilo. Kejawi punika, lombok rawit abrit ingkang sakawit reginipun Rp. 70.000,- saben kilo, samangke mandhap dados Rp. 50.000,- saben kilonipun. Mandhapipun regi lombok jalaran samangke pasudiyan dagangan cumawis kathah, sarta namung dipun dhatengaken saking wewengkon Sleman kemawon.
Subardi
