Ngayogyakarta, www.jogjatv.tv - Atusan warga Ngayogyakarta saking maneka kalangan, malem Jemuwah(7/4), tumut lampah ageng ingkang dipun adani dening Forum Parapsykologi Semesta DIY. Sinaosa kawontenan jawah grimis, ananging lampahing mubeng beteng ingkang dipun sengkuyung warga Ngayogyakarta kasebat tetep lumampah regeng. Saderengipun, para budayawan lan seniman punika ugi ngadani Upacara Subawa Rasa Kaki Gunung Nini Jaladri ing sangajengipun Pagelaran Kraton Ngayogyakarta.
Upacara lampah ageng mubeng beteng kanthi irah-irahan “Subawa Rasa Kaki Gunung Nini Jaladri” mujudaken kridha kangge njunjung Keistimewaan, inggih boten namung magepokan kaliyan Keistimewaan DIY kemawon. Adicara ingkang dipun adani dening Forum Parapsykologi Semesta DIY punika ugi katujokaken kangge nglarasaken sedaya perangan ing bhumi ingkang dumados saking toya, geni, angin lan siti. Kanthi manah wening lan linandhesan raos tresna ngripta katentremaning bangsa, para budayawan, rohaniawan sarta warga Ngayogyakarta tumut ngregengaken kridha kasebat ing sangajengipun Pagelaran Kraton Ngayogyakarta. Lampahing upacara kawiwitan kanthi mendhet pasir ing wewengkon Turgo perenging Redi Merapi sarta toya seganten saking Pesisir Parangkusumo. Pasir lan toya punika mralambangaken calon panganten kakung lan putri, ingkang salajengipun dipun gambaraken lumantar patung Loroblonyo.
Sasampunipun mendhet pasir Merapi lan toya seganten, kekalihipun lajeng dipun wadhahi kendhil, ingkang mralambangaken sesambetan laras. Kangge njangkepi upacara punika, kekalih pambeksa ingkang kadhapuk minangka Kaki Gunung lan Nini Jaladri nggambaraken watakipun manungsa ingkang kebak hawa nepsu. Lan cariyos punika nggambaraken bilih manungsa kedah saged ngendhaleni hawa nepsu. Kanthi makaten, manungsa saged nglampahi gesang kanthi laras.
Ing pungkasaning upacara kasebat, kekalih perangan ingkang sampun dipun sawijekaken dados setunggal, lajeng dipun kirab mubeng beteng Kraton Ngayogyakarta.
Ernyta-Andri Yulianto
