Sleman, www.jogjatv.tv - Kathahipun warga ingkang dados kurban kurdaning Redi Merapi, antawisipun jalaran warga mboten mangertosi tandha-tandha menawi badhe dumados musibah alam. Awit saking punika Gardu Pemantau Merapi, ingkang dipun bangun PMI Sleman ing Dhusun Turgo, Kecamatan Pakem, Kabupaten Sleman, kawawas migunani menggahipun warga, mliginipun kangge mangertosi kawontenaning Redi Merapi.
Sawetawis warga perenging Redi Merapi mawas, kawicaksanan PMI Sleman ngedegaken Gardu Pemantau Merapi ing Dhusun Turgo, Desa Purwobinangun, Kecamatan Pakem, Kabupaten Sleman, minangka lampah ingkang satrep. Jalaran tebihing Dhusun Turgo kaliyan puncaking Redi Merapi namung watawis 6 kilometer, satemah mbebayani menggahipun warga Turgo. Pramila pambangunaning Gardu Pemantau Merapi, ingkang dipun pandhegani dening PMI Sleman punika, dipun tampi kanthi remen dening warga. Kanthi wontenipun gardu kasebat, warga badhe langkung gampil mangertosi kawontenaning Redi Merapi.
Miturut warga, Gardu Pemantau Merapi punika badhe dipun tanjakaken kanthi samurwat. Kejawi dipun ginakaken kangge nyemak kridhaning Redi Merapi, gardu kasebat ugi badhe dipun ginakaken kangge papan rondha Siskamling. Kanthi makaten, gardu pemantau kasebat badhe tansah regeng, inggih ing wanci siyang punapa dene dalu.
Subardi
