Klaten, www.jogjatv.tv - Paguyuban karawitan lansia Ngudi Laras Kecamatan Gantiwarno, Klathen, malem Kemis(13/4), kalawingi nggelar pahargyan pengetan Hari Kartini sarta refleksi tumempuhing lindhu taun 2006 kapengker. Kridha kasebat dipun gelar ing Pendhapi Kecamatan Gantiwarno Klaten, dipun estreni dening sawetawis pejabat Muspika lan sesepuh warga masyarakat Gantiwarno, kanthi pasugatan racikan gendhing gendhing Jawi.
Salebeting pambagyanipun, Camat Gantiwarno, Dwi Purwanto mratelakaken bombong awit ngantos samangke budaya Jawi kadosta kagunan seni karawitan taksih dipun leluri, mliginipun dening warga Kecamatan Gantiwarno. Awit saking punika Dwi Purwanto tansah suka panjurung lan panyengkuyung dhateng warganipun ingkang purun tumut cawe cawe nglestantunaken kabudayan Jawi.
Wondene Zaitun minangka jejering sesepuh Balai Buja mratelakaken, prayogi para kadang ingkang ambyur ing jagading seni budaya Jawi purun nedhak nurunaken kasagedanipun dhateng para wiranem. Kathah sanget warga saking ngamanca ingkang sinau seni lan budaya Jawi ingkang ngemot kaendahan lair lan batos. Sampun ngantos kalampahan, benjing para wiranem menawi badhe nyinau seni budaya Jawi kedah dhateng mancanagari. Wondene bab refleksi tumempuhing lindhu, Zaitun mratelakaken bilih boten perlu menggalihaken lelampahan ingkang sampun kalampah, prayogi menggalihaken menapa ingkang samangke dipun adhepi.
Paguyuban Ngudi Laras mujudaken salah satunggaling paguyuban karawitan ingkang warganipun inggih punika para lansia ing wewengkon Kecamatan Gantiwarno Klaten. Wondene anggenipun kiprah ing babagan karawitan, kejawi tumut nglestantunaken seni karawitan, ugi kangge suka tuladha dhateng para wiranem supados purun ngleluri seni budaya Jawi ingkang adiluhung.
Tim Liputan
Salebeting pambagyanipun, Camat Gantiwarno, Dwi Purwanto mratelakaken bombong awit ngantos samangke budaya Jawi kadosta kagunan seni karawitan taksih dipun leluri, mliginipun dening warga Kecamatan Gantiwarno. Awit saking punika Dwi Purwanto tansah suka panjurung lan panyengkuyung dhateng warganipun ingkang purun tumut cawe cawe nglestantunaken kabudayan Jawi.
Wondene Zaitun minangka jejering sesepuh Balai Buja mratelakaken, prayogi para kadang ingkang ambyur ing jagading seni budaya Jawi purun nedhak nurunaken kasagedanipun dhateng para wiranem. Kathah sanget warga saking ngamanca ingkang sinau seni lan budaya Jawi ingkang ngemot kaendahan lair lan batos. Sampun ngantos kalampahan, benjing para wiranem menawi badhe nyinau seni budaya Jawi kedah dhateng mancanagari. Wondene bab refleksi tumempuhing lindhu, Zaitun mratelakaken bilih boten perlu menggalihaken lelampahan ingkang sampun kalampah, prayogi menggalihaken menapa ingkang samangke dipun adhepi.
Paguyuban Ngudi Laras mujudaken salah satunggaling paguyuban karawitan ingkang warganipun inggih punika para lansia ing wewengkon Kecamatan Gantiwarno Klaten. Wondene anggenipun kiprah ing babagan karawitan, kejawi tumut nglestantunaken seni karawitan, ugi kangge suka tuladha dhateng para wiranem supados purun ngleluri seni budaya Jawi ingkang adiluhung.
Tim Liputan
